Konferenca e Ambasadorëve në Londër në dhjetor të vitit 1912 mund të thuhet se ishte përfitimi më i madh i shqiptarëve në atë kohë pasi që e shpallën një shtet shqiptar të njohur nga fuqitë më të mëdha të botës, por edhe humbje e madhe pasi që nga kjo konferencë mbeten jashtë kufijve shqiptarë shumë vilajete duke e përfshirë edhe atë të Kosovës.
Historiani Ibrahim Gashi, ka thënë për KosovaPress se kjo konferencë është e një rëndësie të veçantë për trojet shqiptare edhe pse i la jashtë shtetit shumë troje me shqiptarë.
“Përkundër të gjitha zhvillimeve të disfavorshme të shqiptarëve në debatet që u zhvilluan në Londër në konferencën e ambasadorëve me insistimin sidomos të Austro-Hungarisë u njoh krijimi i një shteti autonom shqiptar i pavarur nga perandoria Osmane por i mbikëqyrur nga fuqitë e mëdha përderisa pjesa e pafavorshme për shqiptarë është se u sanksionua pushtimi i një pjese të konsiderueshme të territoreve të shqiptare që i përmenda të vilajetit të Kosovës dhe disa viseve tjera do me thënë të vilajetit të Shkodrës dhe të vilajetit të Janinës”, ka thënë ai.
Por, Gashi ka theksuar se rëndësia e kësaj konference zë vend të rëndësishëm në historinë e shekullit XX pasi sipas tij për herë të parë u vendos një shtet shqiptar i pavarur, e që ishte Shqipëria.
“Rrjedhimisht ne shqiptarët që kemi ngelur jashtë kufijve që i caktoi konferenca e Londrës, për neve kjo konferencë është sinonim i një vendimi të padrejtë në raport me pothuaj 50 për qindëshin e territoreve shqiptare që ngelen jashtë kufijve të Shqipërisë londineze por thash sigurisht që në historinë e popullit shqiptar në përgjithësi në historinë e shekullit 20 zë vend të rëndësishëm sepse sanksionoj për herë të parë ekzistimin e një shteti autonom, përkatësisht të pavarur shqiptar, pavarësi kjo e cila u riokonfirmua me vendimet e paqes së Parisit të vitit 1919. Shqipëria londineze me pak ndryshime në kufijtë e saj vazhdoj me ekzistua gjatë gjithë shekullit 20 dhe natyrisht nëse mund të themi kështu, të tërheqim një paralele historike një korrigjim i kësaj padrejtësie që e bëri konferenca e ambasadorëve në Londër me veprimin e faktorit të brendshëm por edhe atij ndërkombëtar u korrigjua pjesërisht në vitin 1999 kur Kosova u shkëput nga sundimi serb dhe e realizoi në vitin 2008 shtetësinë e saj”, ka deklaruar ai.
Gashi ka shtuar se megjithëse flitet se Kosova është privuar nga e drejta e shtetësisë më 1912 dhe se u anashkalua nga Shqipëria në atë kohë, nuk ka mundur të bëhet më shumë. /Telegrafi/