Massimiliano Allegri thuhet se mund të shpëtojë punën e tij te Juventus-i për dy arsye, edhe nëse bardhezinjtë duket se kanë marrë tashmë një vendim për trajnerin italian.
Kontrata e Allegri-t me Juventus-in skadon në qershor 2025. Edhe nëse bardhezinjtë janë pothuajse të sigurt për kualifikimin në Champions League, ata kanë grumbulluar vetëm 13 pikë në 13 ndeshjet e fundit të ligës dhe trajneri i lindur në Livorno është nën kritika për shkak të stilit të dobët të lojës së bardhezinjëve.
Redaktori i “Tuttosport”, Guido Vaciago, shkroi të martën se me sa duket, e ardhmja e Allegri-t është ende e pasigurt, megjithëse njerëzit me lidhje të forta në tregun e transferimeve besojnë se klubi tashmë ka vendosur të shkarkojë 56-vjeçarin.
Vaciago shpjegoi pse Allegri potencialisht mund të shpëtojë ende punën e tij.
“Dyshimet e Juventus-it janë të lidhura me vështirësinë e marrjes së një vendimi në një moment historikisht të vështirë”, shkroi gazetari.
“Çdo vendim që ka marrë klubi gjatë viteve të fundit më së shumti varej nga financat sepse prioriteti është balancimi i tyre”, theksoi ai.
Duke pasur parasysh se Allegri nuk do të japë dorëheqjen në fund të sezonit, shkarkimi i tij dhe stafit të tij do të ishte goxha i kushtueshëm për Juventus-in, mbi 18 milionë euro, nëse trajneri italian nuk gjen një klub të ri për 2024-25.
Për më tepër, Juventus-i do të duhet të shtojë të paktën 4 deri në 5 milionë euro për të punësuar një zëvendësues.
Në të njëjtën kohë, pavarësisht stilit të lojës mbrojtëse, Allegri praktikisht e ka udhëhequr Juventus-in drejt kualifikimit në Champions League, jo zyrtarisht, dhe do të luajë në finalen e Kupës së Italisë ndaj Atalanta-s muajin e ardhshëm.
Me fjalë të tjera, ai ka përmbushur objektivat e klubit, kështu që ai mund të ketë ende një shans për të shpëtuar punën e tij.
Muaji i fundit i ndeshjeve ndoshta do të jetë vendimtar për të ardhmen e Allegri-t, i cili nuk ka fituar ende një trofe në Torino që nga rikthimi i tij në 2021. Albanian Post