Analistët komentojnë protestën e opozitës. Isa Mustafa e Hashim Thaçi t’u hapin rrugën zgjedhjeve të reja
Protesta e djeshme e opozitës së bashkuar, e cila ishte ndër më masivet deri më tani, me kërkesën kryesore të dorëheqjes së kësaj qeverie, si ndëshkim ndaj marrëveshjeve në dëm të shtetit, ndëshkim ndaj instalimit të krimit të organizuar dhe korrupsionit në vend, komentohet si goditje e rëndë për Qeverinë aktuale të Kosovës.
Analistët politikë theksojnë se dorëheqja e kësaj qeverie është e pashmangshme. Kundërshtimi pa argumente i qeverisë për të mos u dorëhequr, që u bë vetëm disa minuta pas përfundimit të protestës së djeshme nga analistët politikë, cilësohet vetëm si një provokim i radhës i Qeverisë së papërgjegjshme dhe blerje kohe, por që gjithsesi do të përfundojë më largimin e saj nga vetë qytetarët.
Analisti politik Albrim Badallaj shpreson që pavarësisht arrogancës me të cilën po sillet pushteti, pa vonesë të madhe, ky lidership qeverisës i papërgjegjshëm të bindet se është pjesë e një shoqërie në tranzicion dhe tranzicionet, pavarësisht se janë të dhimbshme, duhet të ndodhin edhe në kërkim të një qeverisje më të mirë, ashtu sikur e dëshiron qytetari.
“Fillimisht shpresoj që kjo shoqëri në tranzicion të jetë e pjekur në veprimet e saj dhe qëllimet njëkohësisht, duke mos ia kthyer në të njëjtën formë Mustafës, siç ai bënë me qytetarët, sepse ky shtet është i popullit dhe jo i pushtetarëve”, është shprehur ai për “Kosova Sot”. /KS/