Këshilli i Përhershëm i OSBE’së, u ka kujtuar liderëve kosovarë se kanë kaluar pesë muaj që kur Kosova mbajti zgjedhjet e përgjithshme, më 8 qershor, e se ngërçi është duke dëmtuar qëllimin për ndërtimin e një Kosove paqësore, demokratike, të suksesshme ekonomikisht, dhe multietnike, përcjell koha.net.
Përmes një deklarate të KP të OSBE’së thuhet se është e domosdoshme ecja përpara me zbatimin e marrëveshjes së 19 prillit mes Kosovës dhe Serbisë, e lehtësuar nga BE-ja.
“Gjithë kjo punë e rëndësishme duhet të vazhdojë pa ndonjë vonesë. Seanca konstituive e Kuvendit duhet të thirret menjëherë, siç është e paraparë me Kushtetutë, e përcjellë nga formimi i shpejtë i qeverisë së re në pajtim me proceset demokratike”, thuhet në komunikatën e BE’së.
“Ne ju bëjmë thirrje të gjitha partive që të shfaqin lidership, principe demokratike, dhe të lejojnë institucionet e Kosovës që të vazhdojnë punën”, thuhet më tej aty.
BE-ja nënvizon se është e rëndësisë së veçantë vazhdimi i procesit të krijimit të institucioneve duke respektuar vlerat demokratike, përcjell koha.net. Ne gjithashtu mbesim të gatshëm për të ndihmuar institucionet e Kosovës në tentimet e tyre për të tejkaluar krizën e tanishëm politike.