Në Prizren u mbajt seanca gjyqësore ndaj drejtorit të Arsimit Nexhat Çoçaj dhe dy mësimdhënësve Bekim Thaçi e Bedri Çeku.
Këta tre persona akuzohen për keqpërdorim të manifestimit “Java e Remzi Ademajt”.
Shqyrtimi gjyqësor i së enjtes filloi me dëgjimin e ekspertit financiar Agim Kastrati. Ai tha se ka bërë ekspertizën financiare për Javën “Remzi Ademaj” për vitet 2008- 2012.
Për vitin 2008 eksperti tha se kanë qenë të planifikuara nga kryetari i komunës 10 mijë euro, ndërsa pa ndonjë dokument shtesë janë tejkaluar edhe 3 mijë e 803 euro. Kastrati tregoi se ka gjetur fatura të firmës “Bogdani”, pronar i së cilës ishte Nexhat Çoçaj dhe vlerësoi se kishte qenë konflikt interesi, pasi që Çoçaj ka qenë edhe organizator i manifestimit.
Për vitin 2009 eksperti tha se ka konstatuar tejkalime të mjeteve të përcaktuara për këtë manifestim në shumën 4 mijë e 140 euro. Vetëm për vitin 2009 tha se janë bërë shpenzime prej 822 eurove në Firmën “Bogdani”.
Eksperti sqaroi edhe situatën sa u përket transaksioneve për fëmijët e Nexhat Çoçajt. Ai tha se këto pagesa janë bërë nga llogaria personale dhe nuk kanë të bëjnë me mjetet e javës “Remzi Ademaj”.
Për vitin 2010 eksperti tha se nga konkluzioni i kryetarit të komunës janë derdhur në xhirollogarinë e Bekim Thaçit 10 mijë euro, ndërsa sipas tij në këtë vit nuk ka pasur tejkalime të shpenzimeve, mirëpo ka pasur fatura të firmës “Bogdani” në vlerë prej 722 eurove si dhe as për këtë vit nuk ka pasur procedurë tenderuese.
Për vitin 2011 eksperti tha se nga kryetari ishin planifikuar 12 mijë euro, të cilat ishin derdhur në llogarinë e Bekim Thaçit.
“Transakcionet që kanë ndodhë për manifestimin e këtij viti, fillimisht 3 mijë euro janë tërhequr nga llogaria e Bekim Thaçit për pagesën e shpenzimeve të ndodhura, ndërsa pjesa prej 9 mijë eurove i është dhënë zotëri Nexhat Çoçajt, për këtë vit gjithsej janë dokumentuar shpenzime prej 14 mijë e 390 eurove dhe më duhet të theksoj që pos shumës prej 12 mijë eurove, në llogarinë e Nexhat Çoçajt janë derdhur mjete në shumën prej 3 mijë e 500 eurove, të cilat bëjnë një tejkalim të konkluzionit të kryetarit dhe për të cilat nuk kam gjetur në shkresat e lëndës vendim për shpenzime shtesë,” tha eksperti.
Ai tregoi se gjeti shkelje edhe për vitin 2012 rreth parave të ndara për “Javën e Remzi Ademajt”. Këtë vit sipas ekspertit kryetari ndau 10 mijë euro që u derdhën në xhirollogarinë e Bedri Çekut, ndërsa shpenzimet për javën shkuan deri në 10 mijë e 822 euro. Edhe për këtë vit, eksperti tha se nuk ka pasur procedurë tenderuese.
Mbrojtja më pas drejtoi pyetje për ekspertizën edhe sa u përket subvencioneve komunale për javën “Remzi Ademaj” për të cilat eksperti u përgjigj se pavarësisht se janë subvencione çdo para publike duhet të tenderohet përmes prokurimit publik.
Mbrojtja edhe më tutje e sfidoi eksertizën e Kastratit në shumë pika, mbrojtësi i Nexhat Çoçajt në fund u deklarua me vërejtje të pjesshme për deklarimet e ekspertit.
Mbrojtja, po ashtu paralajmëroi se me shkrim do të prezantojë për gjykatën emrat e dëshmitarëve që do të propozojë për dëgjim, si dhe paralajmëroi që do të kërkojnë edhe ekspertizë të re.
“Ne sigurisht do të paraqesim me kohë dëshmitarët eventualë, edhe ne kemi paralajmëru që sipas mendimit tonë do të ketë të nevojshme një ekspertizë të re,” tha avokati Nevzati.
Seancat e radhës do të mbahen më 21 dhe 22 janar 2016.
Drejtori i Arsimit komunën e Prizrenit, Nexhat Çoçaj së bashku me dy arsimtarët Bekim Thaçi e Bedri Çeku, akuzohen nga Prokuroria Themelore në Prizren se keqpërdorën për 5 vjet rresht manifestimin “Remzi Ademaj”, të mbështetur nga Komuna e Prizrenit./kallxo.com/