Ish deputeti Eqrem Kryeziu i ka quajtur barrë të rëndë për Kosovën vitet e robërisë, kohën kur fëmijët shqiptarë përbironin përmes policisë së Serbisë për të shkuar në shkollë.
Me rastin e fillimit të vitit të ri shkollor, Kryeziu i ka kushtuar një status fëmijëve kosovarë të asaj kohe, duke thënë se një Shtatori tash do të duhej të ishte festë nacionale.
“Robëria dhe fëmijët tanë. S’ka dyshim se vitet e robërisë ishin barrë e rëndë për Kosovën. Gjithandej terror, gjithandej ekskomunikim, gjithandej salvim. Por kundërpesha e kësaj zezone ishin fëmijët e Kosovës që ngarendnin çdo ditë me çanta mbi shpinat e pafuqishme për në shkollë”.
“Të rriturit, shkaku i brengave, nuk e hetonin këtë bekim që Kosova kishte. Edhe i jam mirënjohës vëllait tim tashmë të ndjerë, që ma theksoi këtë mrekulli: Ku e marrin atë guxim këta kolopuçër të përbirohen përmes policisë së huaj edhe ushtrisë së huaj edhe çajnë përpara, atje te vendet që i quajnë shkolla? Madje e përsërisin për secilën ditë të lume?”.
“Atë zymtësi të pashpresë të robërisë së rëndë, fëmijët tanë e mbushnin me zërat, me lëvizjet e me hapat e tyre të vegjël. Ata ishin mesazhi i shpresës në kohën kur dukej se ajo ishte zbehur shumë”.
“Përmendorja e parë do të duhej të ishte për ta dhe, për homazh të tyre, Një Shtatori do të duhej të ishte festë nacionale”, ka shkruar Kryeziu në Facebook.