Familja e Shadan Shasivarit nuk ka pranuar që t’i rrënohet shtëpia nga inspektorët e Komunës së Prizrenit. Anëtarët e kësaj familjeje gjatë aksionit të rrënimit të objekteve pa leje nuk kanë dashur as të largohen nga shtëpia e tyre.
“Gjatë intervenimit të policisë, është përdorur edhe dhunë ndaj anëtarëve të familjes”, është ankuar Shasivari. Ai ka paralajmëruar se këtë veprim të pjesëtarëve të Policisë së Kosovës do të denoncoi në organet e tjera të drejtëisë.
“Policia vetëm ka zbatuar urdhërat dhe fajin më të madh për këtë ngjarje e kanë organet të cilat kanë vendosur për rrënimin e objekteve në këtë pjesë të qytetit”.
Në aksionin e përbashkët të Drejtorisë së Inspektoratit dhe asaj të Urbanizmit kanë asistuar edhe pjesëtarët e Njësisë Speciale të Policisë. Për shkak të rrënimit te një pjesë të këtij objekti, policia ka kërkuar nga anëtarët e familjes Shasivari që të largohen nga shtëpia për shkak të rrezikut të shembjes së tërë objektit. Por një kërkesë e tillë është refuzuar nga këta familjarë, me ç’rast policia ka intervenuar në largimin e tyre.
Lidhur me këtë incident TV Prizreni, ka kontaktuar zëdhënësin e Policisë të Prizrenit, kapiten Hazir Berisha.
“Pas mbledhjes së informacioneve, Zyra për Informim publik e Drejtorisë rajonale të Policisë në Prizren do të dal me një raport të përgjithshëm lidhur me këtë incident”, ka thënë Berisha.
Ndërkaq, në vendngjarje ka dalë edhe drejtori i Inspektorateve, Bedri Bytyçi”
“Qysh në aksionin e parë për rrënimin e objekteve në rrugën “ Ueslli Kllark” pronarët e objekteve janë informuar që brenda 10 ditëve të largojnë gjërat me vlerë nga shtëpitë e tyre, ndërsa pohoi se inspektorët komunal do të zbatojnë vendimin për rrënimin e pjesëve të objekteve që ndodhen në pronën komunale. Gjatë incidentit të sotëm, ka qenë i nevojshëm edhe intervenimi i mjekëve nga Qendra e Urgjencës në Prizren, për shkak të gjendjes jo të mirë shëndetësore që ndodheshin disa të moshuar./TV Prizreni/