Mes Panairin të Librit “Tirana 2014” dhe Festivalit të Librit dhe Artit “Pranverë 2014” që organizon këtë vit edicionin e tij të parë, Ministria e Kulturës ka zgjedhur të mbështesë këtë të fundit.
Festivali organizohet nga Shoqëria e Librit Shqip, ku botuesja Arlinda Dudaj, përfaqësuese e kësaj shoqate thekson se nuk bëhet fjalë për panair libri, por për një festival alternativ që promovon artin dhe librin.”Nuk mund të krahasohet Panairi me këtë Festival, sepse janë organizime krejt të ndryshme.
Sigurisht që pjesë e këtij Festivali është dhe Panairi i Librit, ku janë ftuar të bëhen pjesë të gjithë botuesit shqiptarë me stendat e tyre dhe botimet e reja. Gjithashtu do të organizohen edhe ekspozita të veprave të artit dhe do të ndahen dy çmime shumë të rëndësishme: çmimi “Ardian Klosi” në fushën e letrave, dhe çmimi “Danish Jukniu” në fushën e artit.
Pra është një Festival i Artit dhe Librit dhe ndoshta për këtë arsye ministria ka vendosur ta mbështesë”, – shprehet Dudaj.