Të dielën, në Sallën e Kuqe të Pallatit të Rinisë në Prishtinë, Filarmonia e Kosovës do të organizojë një Gala Koncert me rastin e festave të fundvitit.
Sipas drejtorit të Filarmonisë dhe Operës, Baki Jashari, veçantia e këtij koncerti festiv është rikthimi i përmbajtjeve programore vokale me një laramani kontrastesh nga literatura e popullarizuar operistike botërore.
“Bazuar në faktin e mungesës së shtëpisë operistike tek ne, Filarmonia ndjen obligim zyrtar dhe profesional për stimulim dhe avancim artistik të solo këngëtarëve kosovarë”, ka thënë Jashari, raporton KTV.
Dirigjent në këtë koncert do të jetë Nayden Todorov nga Bullgaria, i cili do t’i prezantohet publikut për herë të parë në orkestrën simfonike të Filarmonisë së Kosovës. Në këtë program do të paraqiten modelet më të bukura nga operat e autorëve romantikë si Verdi, Puçini dhe Lehar, por edhe të epokës së barokut.
