Programeri i filmave të shkurtër të DokuFest, Samir Karahoda, është ftuar të prezantoj një program të filmave të shkurtër nga Kosova në Tabor Film Festival në Kroaci, në një program të titulluar “Fokus në Kosovë”.
Programi përfshin prodhime të filmave të shkurtër bashkëkohor nga Kosova: “Kolona” nga Ujkan Hysa; “Ajo vjen në pranverë” nga Antoneta Kastrati, “Si qeni n’rrush nga Driton Hajredini dhe Yll Çitaku; “In memoriam” nga Ilirjan Himaj; “Kaseta e dasmës” nga Ariel Shaban; “Zibidi” nga Nart Zeqiraj si dhe filmat e prodhuar nga DokuFest “I kujt është flamuri?” nga Baris Karamuco dhe “Mur” nga Nicola Polic.
Filmat do të shfaqen të enjtën më 12 qershor dhe të premten më 13 qershor në ora 18:00 në Kino Cinema MMC Zabok.
Festivali Ndërkombëtar i Filmave të Shkurtër – Tabor Film Festival organizohet në lokacionin historik të kështjellës së Veliki Tabor në Desinic të Kroacisë. Edicioni i 12-të do të mbahet nga data 12-15 qershor, 2014.