Njëri nga 19 gjykatësit e sapoemëruar të Gjykatës Speciale ka një përvojë të gjatë gjykimi të rasteve të shumta në gjykatat e Kosovës.
Gjykatësi nga Republika e Çekisë, Vladimir Mikula, është emëruar gjykatës në gjykatën speciale, kompetencat e të cilës përfshijnë gjykimin e ish drejtuesve të UÇK-së, aktakuzat eventuale ndaj të cilëve pritet të lëshohen në javët apo muajt në vijim.
Mikula ka shërbyer për disa vite si gjykatës në misionin e Bashkimit Europian për Sundim të Ligjit në Kosovë, EULEX.
Mikula ka gjykuar disa nga rastet e ndjeshme në Kosovë viteve të fundit përfshirë edhe rastin ndaj kryetarit të komunës së Prizrenit, Ramadan Muja; rastin ndaj ish sekretarit të përhershëm të Ministrisë së Shëndetësisë, Ilir Tolaj; rastin e të akuzuarve për krime lufte ndaj Slbobodan e Sreçko Martinoviq dhe Svetlana Stojanoviq; rastin e Ukë Rugovës; rastin e policëve të Kosovës të akuzuar për incidentin me truprojat e ministrit serb, Aleksandar Vulin si dhe rastin e akuzës për kërcënim të kryetarit të komunës së Skënderajt, Sami Lushtaku, ndaj gazetares Jeta Xharra.
Bashkë me Mikulan, janë emëruar edhe 18 gjykatës të tjerë.