Vetëm disa ditë pasi rreth pesëdhjetë mjekë të Klinikës së Pediatrisë janë kthyer nga “shkolla pediatrike” në Belek të Antalyas, menaxhmenti i Shërbimit Klinik Spitalor dhe Universitar të Kosovës ka nxjerrë një urdhëresë, përmes të cilës ka ndaluar përshkrimin e ilaçeve me emra të prodhuesve, shkruan Zëri.
Drejtori i SHSKUK-së, Curr Gjocaj, ka thënë se ka nxjerrë qarkoren që ua ka dorëzuar gjitha klinikave, ku është bërë urdhëresa që ilaçet të shkruhen me emrat gjenerikë.
Në shkresën e siguruar nga gazeta “Zëri”, të drejtuar gjitha njësive të SHSKUK-së e të nënshkruar nga drejtori Gjocaj, pos urdhëresës për përshkrimin e ilaçeve me emrin gjenerik, thuhet se drejtori në vazhdën e bashkëpunimit me kryeshefin e AKPM-së, para tre muajsh ka pranuar 500 regjistra të ilaçeve që i ka shpërndarë në SHSKUK.