Organizata Joqeveritare “Green Art” do të zhvillojë projekte që kanë për qëllim përfshirjen sa më të madhe të publikut.Fokus të veçant i kushton ngritjes së vetëdijes lidhur me mbrojtjen e mjedisit, riciklimin dhe përfitimet ekonomike dhe pjesëmarrjen qytetare në procesin e vendimmarrjes.
Drejtuesi i “Green Art”, Driton Kastrati tha se ky organizëm sot ka filluar me zbatimin e projektit, i cili ka të bëjë me ruajtjen e lagjeve të Nënkalasë dhe Pantelisë nga ndotja, si dhe ngritjen e vetëdijes së qytetarëve për ruajtjen e mjedisit.
Gjatë aktivitetit “Green Art” ka bërë edhe inaugurimin e shportave për riciklim.Lidhur me këtë është kërkuar që qytetarët dhe institucionet të shfaqin përkujdesje më të madhe ndaj ambientit.
Përkrahje të veçantë në realizimin e këtij aktiviteti të projektit kanë dhënë edhe nxënësit e SHMT “11 Marsi”, të cilët i punuan shportat me punë vullnetare,transmeton TV Prizreni.
“Green Art” zbaton këtë projekt me përkrahje nga Komuna e Prizrenit, gjegjësisht nga Drejtoria e Urbanizmit, Drejtoria e Shërbimeve Publike, Drejtoria e Arsimit dhe Kompania Ekoregjioni./PrizrenPress.com/