Filmi kosovar “Amel”, me regji të More Raçës është vlerësuar lartë në Festivalin ‘Alt Cine Action” që u mbajt në Greqi, e ku ‘Amel’ mori Çmimin ‘Alinda Dimitriou Award’.
Sipas anëtarëve të jurisë, “Amel në 23 minutat e tij sjell një qasje të qartë dhe të freskët të një realiteti kosovar, me një aktrim të përkryer të aktores kryesore, Makfire Miftari”.
Filmi “Amel” trajton rrugëtimin dhe fatin e një aktoreje kosovare drejt përpjekjeve të saj për tu realizuar si artiste.
Në këtë rrugëtim, brenda një vendi të izoluar nga bota si është Kosova , Amelisë i buzëqeshë fati të merr rol nga një produksion i huaj pasi shkon në audicion, por më pas i shfaqen pengesat si nga rrethi, familja ashtu edhe nga Zvicra, e cila ia shkurton të drejtën e vizës , kështu që aktorja mbetet pa mundësinë e realizimit të filmit, që ishte ëndërr e saj prej vitesh.
Çmimi ‘Alinda Dimitriou Aëard’ është çmimi i nëntë që i ndahet filmit kosovar ‘Amel’. Kohë më parë Filmi ”Amel” i regjisores kosovare, More Raça ka fituar çmimin kryesor në edicionin e 20-të të Festivalit Ndërkombëtar të Filmit të Shkurtër, “Corto Imola Festival”.
Festivali ‘AltcineAction!, është njëra ndër ngjarjet kryesore kulturore që mbahet çdo vit në Greqi. Në kuadër të këtij Festivali shfaqen filmat e metrazhit të shkurtër nga vendet e ndryshme të Ballkanit.
Filmi ‘Amel’ është realizuar në vitin 2013. Rolet kryesore në film i luajnë: Makfire Miftari, Hazir Haziri, Veton Osmani etj./infoglobi/