Ministri i Kulturës, Rinisë dhe Sportit Hajrulla Çeku, ka nënshkruar vendimin për përfshirjen e Festivalit Folklorik “Hasi Jehon” si aset i mbrojtur në Listën e Trashëgimisë Kulturore për Mbrojtje të Përkohshme në kategorinë trashëgimisë kulturore shpirtërore.
Festivali folklorik “Hasi Jehon” është institucion unik i ruajtjes, prezantimit, bartjes dhe promovimit të vlerave të trashëgimisë kulturore shpirtërore të shqiptarëve. Andaj ky festival ka shërbyer dhe vazhdon të shërbej si shkollë edukative për ruajtjen, bartjen dhe promovimin e trashëgimisië kulturore shpirtërore tek gjeneratat e reja.
Festivali Folklorik “Hasi Jehon” është themeluar në shtator të vitit 1976 nga SHKA “Malësori” dhe rinia e fshatit Gjonaj të Hasit. Ky festival ka filluar veprimtarinë me individ dhe grupe të vogla të fshatit Gjonaj dhe fshatrave përreth, për të marrë më pas karakterin e një festivali mbarë kombëtar në të cilin debutojnë dhjetra ansamble nga Kosova, Shqipëria, Maqedonia e Veriut, Mali i Zi por edhe vise të tjera ku jetojnë dhe veprojnë shqiptarët.
Përgaditja e dosjes për aplikim dhe dërgimi për procedurë në Komisionin Profesional Shqyrtues, është bërë me iniciativë nga Qendra Rajonale për Trashëgimi Kulturore në Prizren.
