Nënkryetari i PDK-së, Enver Hoxhaj ka thumbuar partitë opozitare gjatë një tubimi të madh në njërën prej degëve bastion të PDK-së në Prizren që përfshin lagjet e Dardanisë, 8 marsi dhe 2 korriku.
Hoxhaj ka thënë se PDK-ja që nga fillimi ka bërë aleanca të vërteta vetëm me qytetarët të cilët e kanë besuar vizionin e saj dhe njëkohësisht PDK-ja është partia që i beson qyetetarëve.
Duke folur para një numri të madh të pjesëmarrësve, Hoxhaj ka thënë se disa parti të vogla në Prizren janë zënë në panik për humbjen duke filluar me akuza por edhe partitë e tjera opozitare në Prishtinë po sillen njësoj.
“Nëse në vitin 2007 i keni besuar premtimëve të PDK-së, tani mund ti besoni punëve të kryera që prej rritjes së rrogave, ndërtimit të autostradës, shkollave e rrugëve, pavarësimit të vendit dhe bashkimi të Mitrovicës. Tani PDK-ja në aleancë me qytetarët e ka ofruar misionin e tretë që është Misioni ynë i ri për zhvillimin ekonomik të Kosovës dhe hapjen e vendeve të punës” ka thënë Hoxhaj.
Në këtë tubim janë prezantuar edhe kandidatët për deputetë nga Prizreni. /Zëri/