Korçë -Dy vajza, 14 dhe 15 vjeç, prej dy ditësh rezultojnë të zhdukura. Prej 48 orësh, familjarët e vajzave, por dhe policia, nuk kanë asnjë informacion mbi vendndodhjen e tyre.
Sipas policisë lokale, rasti është zbuluar, pasi kanë qenë prindërit ata që kanë denoncuar në polici zhdukjen e vajzave të tyre të mitura, të cilat gjatë gjithë kohës shoqëroheshin me njëra-tjetrën.
Të enjten në komisariatin e policisë së Korçës, prindërit e vajzave bënë denoncimin e zhdukjes së tyre. L.Z. 45 vjeç dhe T.D. 44 vjeç, banuese në lagjen nr. 10 të qytetit juglindor, kërkuan ndihmë pranë uniformave blu për gjetjen e vajzave të tyre.
Babai i njërës prej vajzave dhe nëna e vajzës tjetër iu drejtuan policisë, pasi thanë se prej së martës, më 12 maj, fëmijët e tyre janë larguar nga banesa dhe nuk janë kthyer më.
Adoleshentet K.Z. dhe E.D. kishin një miqësi të ngushtë me njëra-tjetrën.
“Ato kishin dalë në shoqërinë e njëra-tjetrës paraditen e së martës për një xhiro nëpër qytet, por nuk janë kthyer më në banesat e tyre”, mësohet të kenë thënë prindërit në polici./Shekulli/