“Dua të ndajë me Ju përshtypjet e mira nga takimi i djeshëm me udhëheqësit e partive politike të Kosovës. Nikoqirja e takimit, Ambasadorja e Shteteve të Baashkuara të Amerikës, Tracy Jacobson dhe Përfaqësuesi i Bashkimit Evropian, Samuel Zbogar…”, shkruan kryetari i Lidhjes Demokratike të Kosovës, Isa Mustafa, në rrjetin social Facebook.
Po japim postimin e plotë të kryetarit të LDK-së, Isa Mustafa.
Dua të ndajë me Ju përshtypjet e mira nga takimi i djeshëm me udhëheqësit e partive politike të Kosovës.
Nikoqirja e takimit, Ambasadorja e Shteteve të Baashkuara të Amerikës, Tracy Jacobson dhe Përfaqësuesi i Bashkimit Evropian, Samuel Zbogar, sikur edhe herave tjera, me konstruktivitetin e tyre, na ndihmuan të qartësojmë pozicionet dhe t’i përafrohemi zgjidhjeve për çështjet e rëndësishme që duhet të përmbyllim përpara se ta përgatisim vendin për zgjedhje të reja.
Ne kemi diskutuar hapur për të gjitha temat dhe jemi pajtuar të vazhdojmë bisedat tona për të gjetur zgjidhjet më të mira për miratimin nga Kuvendi i Republikës së Kosovës të Ligjit për Forcat e Armatosura, dhe, eventualisht, Ligjit për Zgjedhje dhe të propozojmë datën e zgjedhjeve të parakohshme parlamentare.
Ajo çka është e rëndësishme, ne jemi pajtuar që asnjëra prej këtyre çështjeve të mos kushtëzohet me asnjë proces tjetër. Por, të punohet me seriozitet dhe në përputhje me normat demokratike dhe Kushtetutën e vendit tonë.
Votat e LDK-së për Forcat e Armatosura dhe për Ligjin e ri të Zgjedhjeve janë të sigurta. Në ditët në vijim, bashkëpunëtorët e mi dhe unë do të mundohemi t’i bindim edhe kolegët tjerë për të vepruar kësisoj. Sepse krijimi i Forcave të Armatosura është garanci e mbrojtjes dhe sigurisë së të gjithë qytetarëve të vendit tonë.
Në këto procese, qeveria aktuale ka detyrim kushtetues dhe moral të japë kontributin e saj. Ajo duhet të sigurojë mbështetjen e deputetëve të koalicionit qeverisës për votimin e këtyre ligjeve të rëndësishme. Po ashtu, atyre u takon të reflektojnë mbi domosdoshmërinë e caktimit të datës së zgjedhjeve brenda pjesës së parë të këtij viti dhe të japin kontributin që u takon për organizimin e zgjedhjeve të lira, fer e demokratike.
LDK dhe unë i kuptojmë përpjekjet e përfaqësuesve të koalicionit aktual qeverisës për shtyrjen e zgjedhjeve. Por, po ashtu jemi të bindur se shtyrja e zgjedhjeve është edhe zgjidhje e keqe. Sepse koalicioni aktual nuk e ka më shumicën parlamentare dhe praktikisht është e bllokuar. Ajo duhet ta zhbllokojë jetën institucionale të Kosovës dhe t’i nënshtrohet vullnetit të sovranit.