Në legjislaturën e kaluar kishte qëndrime të ndryshme nga ana e deputetëve rreth ndryshimeve në Projektligjin për të drejtat dhe përgjegjësitë e deputetëve, i cili ka mbetur për të vazhduar me procedura edhe në legjislaturën e re.
Projektligji për të drejtat dhe përgjegjësitë e deputetëve parasheh që deputetët e të gjitha legjislaturave të gëzojnë pensione dhe privilegje të tjera.
Ndryshimet në projektligjin e ri janë bërë në aspektin e moshës dhe në përqindjet e përfitimeve të mundshme, por thelbi nuk kishte ndryshuar.
Sipas projektligjit, deputetëve me një mandat do t’u takojë 30 për qind e pagës bazë të deputetit, 35 për qind për ata me dy mandate, ndërsa ata me tri mandate 40 për qind, ndërsa mosha e pensionimit do të jetë 60 vjeç.
Ndërkohë, janë rreth 33 ish-deputetë me një, dy apo tre mandate që kanë arritur moshën e pensionimit 60 vjeç.
Pavarësisht zbutjes së privilegjeve nga ana e Komisionit për legjislacion, deputetët e rinj, që i kanë marrë votat e mjaftueshme për të përfaqësuar popullin në legjislaturën e pestë të Kuvendit të Kosovës, janë kundër privilegjeve të tepërta. /KosovaSot/