Gazetari dhe aktivisti i shoqërisë civile nga Komuna e Prizrenit, Kastriot Jahaj, ka thënë se turpi dhe përgjegjësia për tragjedinë e Prizrenit, ku humbi jetën një fëmijë tre vjeçar nga shembja e një muri në zonën historike të qytetit bie mbi kryetarin e komunës, Ramadan Muja dhe Ministrinë e Kulturës.
Jahaj ka thënë në Info Magazine të Klan Kosovës se “kemi një ministri të papërgjegjshme dhe një kryetar të dënuar të Prizrenit”, dhe për të këta duhet të bëhen përgjegjës.
“Për këtë rast duhet të flasë ministri i Kulturës, ministri i Ambientit dhe kryetari i komunës. Përgjegjësia është tek ministrat dhe kryetari i Komunës së Prizrenit. Përgjegjësia është shumë e qartë, turpi është shumë i qartë”.
Madje Jahaj është shprehur i befasuar si është e mundur që ende nuk ka kurrfarë vendimi as nga komuna e as nga ministria.
“Nuk po dëgjojmë nga ministri a e Kulturës dhe Komunës së Prizrenit asnjë vendim të marrë për këtë rast. Prokuroria është dashur të marrë masa menjëherë pas këtij rasti dhe dikush të arrestohej”.
