Përkundër se ka edhe të paktën një vit deri në kohën kur do të mbahen zgjedhjet e rregullta lokale, partitë kryesore politike në Rahovec kanë dhënë indikacione se kush mund të jenë kandidatët e tyre për kryetar të Komunës së Rahovecit.
Në zgjedhjet e ardhshme, që pritet të mbahen në fund të vitit të ardhshëm, partitë kryesore politike po i japin rëndësi jo të vogël Rahovecit, duke ditur se vota shpesh ka qenë pothuajse e barabartë mes PDK-së, LDK-së e AAK-së dhe se pushteti jo rrallë është ndërruar në këtë komunë.
Në bazë të aktiviteteve të dendura, udhëheqjes së deritanishme dhe një lloj rritje të ndjeshme të aktiviteteve kohëve të fundit, përkundër se jo rrallë është kritikuar për udhëheqjen e Komunës në mandatin e tij aktual edhe nga vet anëtarë të strukturave të PDK-së, situata në terren lë të kuptohet se Kryetari aktual i Komunës, Idriz Vehapi, pritet të ri-kandidohet për këtë pozitë nga partia në pushtet, shkruan RahovecPress.
Vehapi ka intensifikuar aktivitetet në ditët e fundit, duke plasuar edhe disa lajme në të cilat vërehet qartë tendenca që të afrohet më shumë me votuesin pasi që po krijon terren për ri-kandidim.
Mirëpo, Vehapi nuk “po lihet rehat” në aktivitetet e tij nga udhëheqësi i degës së LDK-së në Rahovec, Avdullah Hoti, që është ministër i Financave dhe njëkohësisht kryetar i degës së LDK-së në Rahovec, që është edhe partner i Vehapit në qeverisjen aktuale.
Ministri Hoti jo rrallë në kohët e fundit, bashkë me strukturat e LDK-së në Rahovec ka marrë pjesë në një numër më të madh të aktiviteteve se zakonisht, madje në shumë aktivitete që fare nuk i kanë takuar ministrisë që ai drejton, duke dhënë shenja se do të jetë kandidat i partisë së tij për zgjedhjet e ardhshme lokale.
Përkundër se ai ka një post të rëndësishëm në qeveri, ai pritet të “sakrifikohet” në këtë rast, pasi që, sipas burimeve të RahovecPress, LDK e sheh atë si kandidatin më të denjë për ta rifituar Rahovecin pas kaq shumë vitesh.
Ndërkaq, përkundër se akoma nuk e ka filluar fushatën si dy të lartëpërmendurit, duket se nga radhët e AAK-së do të ri-kandidojë ish-kryetari i Komunës së Rahovecit, Smajl Latifi.
Edhe nga AAK Latifi shihet si kandidati më adekuat për të qenë konkurrent serioz për t’i fituar potencialisht zgjedhjet në Rahovec.
Një gjë është e sigurtë, përkundër se zgjedhjet ka akoma të paktën një vit deri kur do të mbahen, partitë politike në Rahovec kanë filluar që ta përgatisin terrenin me “fushatë të lehtë” dhe aktivitete intensive në prag të vitit 2017.
Në zgjedhjet e fundit lokale në Rahovec, Idriz Vehapi nga PDK kishte marrë 9,609 vota apo 38,65%, Smajl Latifi nga AAK 8,169 vota apo 32,86% kurse Fahredin Shehu nga LDK 5,512 vota apo 22,17%.
Në balotazh, ku diferenca e votave ishte shumë e vogël, kishin shkuar Vehapi e Latifi. Vehapi kishte fituar 11,890 vota apo 53,81%, kurse Latifi 10,810 vota apo 47,62%. /RahovecPress