Pas një sëmundje të shkurtër, Prof.Dr Ali Jakupi, sot në moshën 70 vjeçare ka ndërruar jetë. Varrimi i të ndjerit bëhet të martën në ora 12:00 në Varrezat e Prishtinës, lagjja Arbëria.
Prof.Dr. Ali Jakupi u lind më 26.06.1943, në Shalë të Vushtrrisë. Shkollën fillore e përfundoi në Vushtrri, ku e kaloi një pjesë të fëmijërisë dhe rinisë. Shkollën e Mesme Normale, e kreu në Mitrovicë, Fakultetin Ekonomik në Prishtinë, ndërsa studimet pasuniversitare dhe magjistraturën (nga lëmia e Marketingut) në Zagreb.
Me shkrime ka filluar të merret që nga fëmijëria. Ka botuar një numër të konsiderueshëm veprash, të zhanreve të ndryshme Ishte Doktor i Shkencave Ekonomike dhe Profesor i Fakultetit Ekonomik të Universitetit të Prishtinës, për lëndët e Marketingut.
Jakupi ishte drejtor i përgjithshëm në Ndërmarrjen “Kosova” dhe “Polet”, të Vushtrrisë, njëherit ishte edhe drejtor i Tregtisë, zëvendësdrejtor i përgjithshëm dhe drejtor i përgjithshëm në Ndërmarrjen “Rilindja”, Ministër i Tregtisë dhe Industrisë në Qeverinë e Parë të Kosovës, profesor në Universitetin e Tetovës, profesor në Universitetin AAB, si dhe në Fakultetin Ekonomik të Universitetit të Prishtinës.