Shoqatat e luftës sërish kanë ngritur tensione rreth pranimit të kandidatëve të tyre në Universitetin e Prishtinës. Kësaj radhe duke cituar zyrtarë të lartë të Rektoratit t’u kenë premtuar regjistrim në Universitet, ndonëse menaxhmenti kishte vendosur ndryshe, shkruan sot Koha Ditore.
Kështu, zyrtarë të lartë të UP-së dhe kandidatët për studentë në këtë universitet, nga listat e kategorive të luftës, kanë dalë me deklarata krejtësisht kundërthënëse, pas një takimi të përbashkët që kanë mbajtur në Rektoratin e UP-së.
Një grup i kandidatëve nga shoqatat e luftës janë takuar të enjten paradite me kryetaren e Këshillit Drejtues të UP-së, Shefkije Islamaj, dhe menjëherë pas takimit kanë deklaruar para gazetarëve se Islamaj u ka premtuar regjistrim në UP.
Argjend Softolli, përfaqësues i grupit të kandidatëve, tha para gazetarëve se kryetarja Islamaj ka thënë se studentët kanë të drejtë në kërkesat e tyre.