Kandidati për kryetar të Komunës së Malishevës nga radhët e Partisë Demokratike të Kosovës, Isni Kilaj, mbrëmë ka prezantuar programin e tij qeverisës për katër vitet e ardhshme, me moton “Qeverisja e mirë vazhdon…për Malishevën Evropiane”, para banorëve të fshatit Guncat të Malishevës.
Kilaj tha se duhet t’i besoni punës sonë, sepse i kemi bërë premtimet realitet dhe asnjëherë nuk kemi premtuar me fjalë boshe dhe pa mbulesë. “Edhe këto projekte për katër vitet e ardhshme, janë kryekëput të planifikuara me buxhetin komunal. E kësaj kur i shtohen edhe premtimet për mbështetje nga Qeveria e Kosovës dhe kryeministrit Thaçi, atëherë, Malisheva, do të ketë edhe më shumë investime, se sa ne ju premtojmë”, tha ai.
Kandidati për kryetar, Isni Kilaj tha se brenda dy viteve, të gjitha rrugët dhe rrugicat në fshatra do të ndërtohen. “Ne për katër vite i kemi shtruar rreth 200 km asfalt, e për dy vite, nuk do ta kemi problem, ti ndërtojmë edhe më pak se 50 km, të mbetura nëpër rrugicat e fshatrave tona”, tha Kilaj.
Në fund, Kilaj tha se pasi të kemi rregulluar infrastrukturën, atëherë fokusimi do jetë zhvillimi ekonomik, me theks të veçantë bujqësia, ndërsa mbrojtja e ambientit, do të jetë pikë tjetër me rëndësi për qeverisjen tonë.
Ndërkaq, deputetët e Kuvendit të Kosovës, Hasime Mazreku-Krasniqi dhe Halit Krasniqi, duke i dhënë mbështetje Kilajt, thanë se oferta e PDK-së është serioze. “Kjo është oferta më serioze, më e realizueshme dhe çdo shtyllë e programit, e planifikuar mirë për mënyrën e financimit dhe realizimit”./PrizrenPress.com/