Kryetari i Parlamentit të Shqipërisë Iliri Meta ka bërë një vizitë jozyrtare në Kosovë. Ai gjatë ditës së diele është takuar në një nga restoranet e Prizrenit me Fatmir Limajn. Ky takim megjithëse nuk është zyrtar, duket se ka pasur një qëllim politik. Duket se e vetmja arsye e takimit të Metës me Fatmir Limajn është ndërmjetësimi i tij për të ulur “gjakrat’ në mes të konfliktit të hapur politik të Limajt me Hashim Thaçin.
Burime të sigurta të gazetës “Bota sot’ bëjnë të ditur se në këtë takim temë kryesore ka qenë konflikti i fundit politik ne mes të Thaçit e Limajt. Kryetari i Parlamentit duket se ka marrë porosi nga vetë Edi Rama e Hashim Thaçi që të ndikojnë te Fatmir Limaj që të mos sulmojë aq shumë PDK-në dhe Hashim Thaçin sepse me humbjen eventuale të PDK-së në këto zgjedhje humbin që të dy, edhe Thaçi edhe Limaj.
Burime tona nuk bëjnë të ditur se sa ka arritur të ndikojë Ilir Meta te Fatmir Limaj. Por se zyrtarët e shtetit shqiptar janë të interesuar që të ruajnë stabilitetin dhe pushtetin aktual në Kosovë kjo nuk do shumë koment. Rama e Meta në Shqipëri preferojnë që të kenë Hashim Thaçin në pushtet në Kosovë e pse jo edhe Limajn bashkë me kryeministrin e Kosovës./Bota Sot/