Sot në Gjakovë, përfaqësues të Festivalit Ndërkombëtar i Filmit Dokumentar dhe të Shkurtër DokuFest bashkë me drejtoreshën e Drejtorisë së Arsimit, Diana Qarkaxhija dhe drejtorin e shkollës së mesme “Hajdar Dushi”, Bedri Cahani, u pajtuan për ta nënshkruar një marrëveshje lidhur me bashkëpunimin e shkollave të mesme të komunës për formimin e klubeve të filmit të cilat do të udhëhiqen nga nxënësit dhe kanë për qëllim inkuadrimin e filmave dokumentar në mësimdhënie.
Ky projekt i ofron shkollave filma dokumentarë dhe manual metodikë për mësim rreth temave aktuale që kanë të bëjne me të drejtat e njeriut.
Drejtoresha e Drejtorisë së Arsimit, Diana Qarkaxhija ka shprehur gatishmëri për bashkëpunim me të gjitha shkollat e komunës, si dhe për shfrytëzimin e mjeteve të shkollave për shfaqjen e filmave.
“Është shumë me rëndësi involvimi i nxënësve në këto lloj aktivitete për arsye se kjo iu hap rrugën atyre që janë të talentuar dhe kanë dëshirë të vazhdojnë në prodhimin e filmave”, tha ajo.
Ndërkaq, drejtori i njërit prej gjimnazeve më të mira në komunën e Gjakovës, Bedri Cahani, tha: “Shkolla jonë prodhon filma të metrazhit të shkurtë, dhe ka interesim të jashtëzakonshëm në pjesëmarrje në këtë projekt, kështu që për ne është shumë i mireseardhun ky rast, për arsye se fëmijët kanë mundësi të mësojnë më shumë lidhur me filmat. Gjë edhe më e mirë që edhe mësimdhënësit do të inkuadrohen, do të trajnohen dhe do t’ia japin këtë dije nxënësve. Une jam shumë i gatshëm dhe shpreh interesim të lartë për këtë bashkëpunim”.
Përpilimi i materialeve për shkolla si dhe kooperimi me sistemin e arsimit, ka bërë që DokuFest të jetë një faktor i rëndësishëm në komunitet duke kontribuar në edukimin dhe duke e rritur vetëdijen e nxënësve kosovar në kuptimin e çeshtjes së drejatve të njeriut.
“Shkolla dhe Filmi Dokumentar – Promovimi i vlerave demokratike të të drejtave të njeriut përmes filmit” përkrahet nga National Endowment for Democracy NED. /PrizrenPress.com