Edhe sot, shtatë vjet më vonë, një copëz e kësaj lumturie të kaluar ka mbetur brenda teje, lëkurëhollë. Vetëkuptohet, për shumë muaj në jetën tënde nuk pati tjetër përveç kësaj dashurie, ti ishe ajo, ti nuk ekzistoje më. Çfarë dhuntie, çfarë dhuntie e tmerrshme të jesh i zoti të heqësh lëkurën, të harrosh vetveten deri në këtë shkallë. Ti ndihesh i pavdekshëm, por jo i pavdekshëm si njeri, por sikur ti, deri atë çast vdekatar, të gjesh një çast pavdekësie” (“Koha e ngrirë”, Anna Kim) . Që nga mbarimi i luftës në ish-Jugosllavi, Komiteti Ndërkombëtar i Kryqit të Kuq ka njoftuar për më tepër se 30 000 njerëz të humbur.
Sipas të dhënave zyrtare më të fundit, janë identifikuar afërsisht 15.000 persona. Ky është sfondi i ngjarjes që Anna Kim na rrëfen në librin e saj të dytë “Koha e ngrirë”: kërkimet e një kosovari për fatin e gruas së tij të zhdukur dhe depërtimi hap pas hapi i tregimtares, në vetë të parë, në bashkëlidhjet komplekse që qëndrojnë pas kësaj ngjarjeje traumatizuese. Ajo jo vetëm që fillon të njohë jetën e përditshme në zonat konfliktuale shqiptaro-serbe, por para së gjithash, asaj fillojnë t’i shfaqen përmasat e mirëfillta të kujtimeve dhe të humbjes së kujtimeve, të jetëshkrimeve të këputura në mes.
“Koha e ngrirë” është çmuar me çmimin “Heinrich Treichl” të Kryqit të Kuq Austriak (2009), bursën “Elias Canetti” (2009) dhe çmimin e Bashkimit Europian për letërsinë për vitin 2012. Stili poetik dhe guximtar e bën këtë vepër tërheqëse edhe për të gjithë ata lexues të mirë, që kërkojnë një lloj letërsie të re. Shpalosja e përmasave të kujtesës dhe humbjes së saj, e fateve të këputura në mes dhe një “kohe të ngrirë” që fotografon jetën para e pas tmerreve të pakuptimta të luftës, është boshti i tij.
Anna Kim lindi në 1977 në Daejeon, Korea e Jugut, dhe u shpërngul në Gjermani në 1979. Ajo studioi Filozofi dhe Teatër në Universitetin e Vjenës. Ajo ka botuar tri romane: ‘Anatomie einer Nacht’ (Anatomia e një nate, 2012), ‘Die gefrorene Zeit’ (Koha e ngrirë, 2008) dhe ‘Die Bilderspur’ (Gjurmë fotografish, 2004). Gjithashtu, ajo ka botuar disa tregime, ese dhe poezi në gazeta, revista letrare dhe antologji, si edhe një vëllim me poezi, Das Sinken ein Bückflug. Kim është çmuar me çmime dhe bursa të ndryshme dhe jeton në Vjenë.