Ish-ushtarët e Ushtrisë Çlirimtare të Kosovës, do të përballen gjatë këtij viti me një Gjykatë Ndërkombëtare ku do të mbrohen për krimet e kryera gjatë luftës.
Këtë radhë për këtë punë, nuk është Tribunali i Hagës, por një Gjykatë Evropiane që do të krijohet ekskluzivisht vetëm për krimet e pretenduara t’i kenë kryer udhëheqësit e ushtarët e UÇK’së, gjatë luftës së fundit në Kosovë. Krime të cilat janë përshkruar në raportin e senatorit zviceran Dick Marty.
Kësisoj, lufta e UÇK’së është e vetmja luftë në ish-Jugosllavi, që do të trajtohet edhe nga një mekanizëm tjetër ndërkombëtar, pos atij të Tribunalit të Hagës.
Burime të gazetës “Tribuna” kanë bërë të ditur se janë kryer konsultimet për krijimin e kësaj gjykate që do të trajtojë aktakuza të mundshme që do të dalin nga hetimet për trafikim organesh, trajtim çnjerëzor, trafikim me narkotikë dhe një varg dyshimesh tjera të përshkruara nga Marty.