Konsiderohet si njëri nga festivalet më të njohura dhe më të vjetra në vend, si i tillë festivali i muzikës qytetare ‘’Zambaku i Prizrenit’’, i cili u themelua në vitin 1986 e që ishte thuajse i vetmi organizim që mblidhte çdo vit artistët më të njohur shqiptarë në qytetin e vjetër të Prizrenit këtë vit ai shënoi edicionin e tij të 26-të me radhë. Kjo ngjarje kulturore dhe artistike u mbajt me datën 30 të muajit gusht në qytetin e Prizrenit.
Në atë natë shumë të ftuar dhe qytetarë prizrenas u mblodhën për të përcjellë dhe parë nga afër garën në mes këngëtarëve të ardhur nga vende të ndryshme shqipfolëse. Në këtë mbrëmje fituese doli këngëtarja nga Shqipëria, vlonjatja Rovena Ibrahimi, e cila nga juria profesionale u shpërblye me çmimin ‘’Zambaku i Argjendtë’’.
Pavarësisht asaj që organizatori i këtij edicioni, kompozitori kosovar Valdet Sopjani tha për gazetën Tribuna që ky festival këtë vit ka shkuar më mirë se sa e kishte planifikuar ai, për shkak të kohës, sipas tij, të shkurtë që kishte pasur në dispozicion për përgatitje, janë këngëtarët tanë ata që kritikuan këtë ngjarje dhe shprehen indinjatën e tyre rreth këtij evenimenti, veçmas për kualitetin dhe cilësinë./tribuna/