Kryetar i Odës Regjionale të Avokatëve në Prizren është zgjedhur Hajrip Krasniqi.
Krasniqi u votua nga 29 avokatë nga 45 sa ishin të pranishëm gjatë votimit.
Ai pati për kundërkandidate Bahrije Besimin që fitoi besimin e 15 avokatëve.
Besimi kontestoi zgjedhjen e Krasniqit, duke bërë të ditur se i zgjedhuri kryetar i Odës Regjionale mban edhe një pozitë tjetër.
Hajrip Krasniqi, është zgjedhur kryetar Degës Regjionale të Avokatëve ne Prizren.
“Hajrip Krasniqi për momentin është zëvendëskryetar i Odës së Avokatëve në nivel Kosove dhe konsideroj që është bërë një shkelje procedurale me guximin e tij që ia ka paraqitur kandidaturën degës rajonale këtu. Ai nuk do t’i realizojë dy postet, a do të ketë të drejtë ligjore t’i ketë dy poste, edhe si zëvendëskryetar i Odës së Avokatëve, edhe si kryetar i degës?” shtroi pyetjen Besimi.
Por Hajrip Krasniqi thotë se mbajtja e këtyre dy posteve nuk i kontestohet as me Ligjin mbi Avokatinë, por as me rregullore.
“Më 16 nëntor më skadon faktikisht posti i zëvendëskryetarit. Zgjedhjet që bëhen fillimisht në degët regjionale, pastaj do të pasojnë edhe zgjedhjet e Odës së Avokatëve të Republikës së Kosovës dhe që ligjërisht dhe me statut, me Ligjin mbi Avokatinë dhe rregulloren mbi punën e degëve regjionale, nuk kufizohet e drejta ime për kandidim,” tha Krasniqi.
Ai zgjedhjen në pozitën e kryetarit e lidhi me punën që ka bërë.
“Sot u rikonfirmua puna ime me vetë besimin që ma dhanë gjithë kolegët për këtë post të degës regjionale në Prizren,” tha Krasniqi.
Mbledhja ku u zgjodh kryetar Hajrip Krasniqi pati edhe debate në lidhje me çështje tjera.
Avokatët Rexhep Kabashi dhe Esat Gutaj thanë se mbledhja ka nisur mbrapsht, pasi kryesia e kaluar nuk ka dorëzuar ndonjë plan të punës së odës. Avokati Naim Qelaj kërkoi që votimi për kryetar të bëhet me vota të hapura, por një propozim i tillë nuk kaloi dhe u votua me vota të fshehura.
Dega Regjionale e Avokatëve në Prizren ka si anëtarë 62 avokatë./kallxo.com/