Në Kompleksin e Lidhjes Shqiptare të Prizrenit, pas nënshkrimit të marrëveshjeve mes Qeverisë së Republikës së Kosovës dhe Këshillit të Ministrave të Republikës së Shqipërisë, dy kabinetet qeveritare u përkujdesen që të bëjnë edhe një foto të përbashkët. Kryeministri i Shqipërisë, Edi Rama është futur në mes të kryeministrit, Hashim Thaçi dhe zëvendëskryeministrit Hajredin Kuçi. Kurse, ministri i Punëve të Jashtme, Enver Hoxhaj, shihet në rendin e dytë, përderisa homologu i tij, Ditmir Bushati, ka zënë një vend në rendin e parë.
Në këtë foto mungojnë zëvendëskryeministrja, Edita Tahiri, e cila ka qenë në Bruksel duke diskutuar me përfaqësuesit e BE-së dhe delegacionin serb për inaugurimin e komunave në veri të Kosovës, dhe ministrja e Integrimit Evropian, Vlora Çitaku, e cila është zëvendësuar nga zëvendësministri, Gëzim Kasapolli, shkruan Epoka e re.
Në foton e dy kabineteve qeveritare nuk shihen zëvendëskryeministri, njëherësh ministër i Administrimit të Pushtetit Lokal, Slobodan Petroviq dhe dy ministrat tjerë serb, Nenad Rashiq dhe Dalibor Jevtiq, të cilët ishin prezentë në hapjen e mbledhjes së dy qeverive.