Gjykata Themelore e Prishtinës ua ka vazhdar paraburgimin zyrtarëve të arrestuar të UP’së. Prokurori i rastit Abdurrahim Islami ka thënë për Express se paraburgimi është zgjatur për 2 muaj të tjerë. Vendimi ende nuk është bërë zyrtar. Përveç 11 të arrestuarve, nën hetime sipas prokurorisë janë edhe 2 persona në procedurë të rregullt. Të përfshirë në skandalin e UP’së, në total janë 13 njerëz.
Të arrestuarve në Fakultetin e Mjekësisë iu është vazhduar paraburgimi edhe për dy muaj të tjerë.
Lajmin e ka konfirmuar për Express, Prokurori i rastit Abdurrahim Islami.
Sipas tij, vendimi është marrë megjithëse akoma nuk është bërë publik.
“Kërkesa ime është miratuar. Unë dje kam marr njoftimin se 11 të arrestuarve u është vazhduar paraburgimi edhe për 2 muaj të tjerë”, ka thënë Imeri për Express.
Kjo masë sipas prokurorit i është vazhduar të gjithë të arrestuarve, nëntë prej të cilëve ndodhen në qendrën e paraburgimit dhe dy të tjerëve që ndodhen në arrest shtëpiak.
Sipas tij, përveç këtyre 11 të arrestuarve dhe dy të tjerëve që po trajtohen në procedurë të rregullt, të dyshuar të tjerë se kanë bërë dallavere në UP, aktualisht nuk ka.
“Jemi në fazën e hetimeve, deri më tash nuk ka zgjerime të listës së dyshuarve”, ka thënë ai.
Kështu, nëntë të dyshuarit pritet të qëndrojnë edhe të paktën dy muaj në paraburgim nën dyshimet se kanë kryer vepra penale të korrupsionit dhe mitmarrjes në këmbim të regjistrimit të studentëve veçanërisht në Fakultetin e Mjekësisë.
Para një muaji, njëmbëdhjetë zyrtarë të UP’së, ne mesin e tyre edhe asistent, mjek e studentë ishin arrestuar nën dyshimin se kanë marrë prej 4 deri në 10 mijë euro për regjistrimin e një studenti në Fakultetin e Mjekësisë.
Po ashtu ky Grup kriminal dyshohet se kanë marrë prej 100 deri në 500 euro një studenti për të kaluar një provim në Fakultetin e Mjekësisë.
Në mesin e të arrestuarve është Esat Belaj (1984) nga Studenica e Istogut, Asistent në Fakultetin e Mjekësisë. Ai dyshohet si “koka” e regjistrimeve me ryshfet në Fakultetin e Mjekësisë dhe i pari në listën e të arrestuarve, kishte shkruar Koha Ditore.
Rejan Zeneli (1984) nga Istogu, është bashkëpunëtor i Esat Belajt. Është nën hetime edhe në raste të tjera për falsifikim, mashtrim, falsifikim i dokumenteve dhe legalizim i përmbajtjes së pavërtetë.
Si të dyshuar për vepra penale të dënueshme më shumë vjet burgim janë edhe:
Kemajl Gashi (1986) nga Vushtrria, po ashtu asistent në Fakultetin e Mjekësisë.
Arjan Janova (1985) nga fshati Korroticë e Lartë e Drenasit, asistent i angazhuar në Fakultetin Filozofik.
Leonard Bytyqi (1987), nga Prizreni, mjek në Qendrën e Mjekësisë Familjare në Suharekë.
Albion Haxhijaha (1988) nga Rahoveci, mjek në Repartin e Internos në QKU.
Mevledin Beqiri (1984) nga Olshani i Vushtrrisë, i diplomuar në Mjekësi.
Gazmend Maliqi (1984) nga Kijeva e Malishevës, asistent në Fakultetin e Mjekësisë.
Arton Hoti (1984) nga Jashanica e Klinës, mjek në Qendrën e Mjekësisë Familjare në Gjakovë
Kushtrim Morina (1988) nga Rahoveci, ekonomistë i papunë dhe
Muhamet Maliqi (1983) nga fshati Busovatë i Kamenicës, student i Fakultetit të Mjekësisë.
Të gjithë këta janë arrestuar më 12 dhjetor të vitit të kaluar nga një operacion i Drejtorisë për Hetime të Krimeve Ekonomike dhe Korrupsion, në pjesë të ndryshme të Kosovës.
Të gjithë janë arrestuar nën dyshimin për veprat penale “marrje ryshfeti, keqpërdorim i detyrës zyrtare, raste të posaçme të falsifikimit të dokumenteve dhe legalizim i përmbajtjes së pavërtetë’,.
Ndërsa, masën e arrestit shtëpiak, Gjykata ua ka caktuar vetëm Albion Haxhijahës dhe Muhamet Maliqi./Express/