Është shuar në moshën 86 vjeçare aktorja e shquar e skenës shqiptare Besa Imami. Aktorja e njohur e skenës ndërroi jetë në moshën 86 vjeçare të djelën e 21 Shtatorit pas vuante prej kohësh nga një sëmundje e rëndë.
Në ambjentet e Teatrit Kombëtar, në nderim të aktores, u zhvillua sot ceremonia e lamtumirës, e cila bëri bashkë artistë, politikanë, si Robert Ndrenika, Tinka Kurti, Margarita Xhepa, Tefta Radi, ministri Erjon Veliaj, kryeparlamentari Ilir Meta, kryebashkiaku Lulzim Basha.
“Një ditë e trishtuar për qytetarët dhe sidomos për komunitetin e njerëzve të kulturës, artit, teatrit e kinamtografisë shqiptare, pasi një ikonë e ekranit, është ndarë nga jeta, duke lënë një dhimbje të thellë, për të gjithë . Por ajo ka lënë pas një trashëgimi të shkëlqyer të veprave që ka intepretuar përmes punës dhe talentit të saj të cilat do të ndihmojnë ta kujtojmë përgjithmonë” është shprehur kryeparlamentari Ilir Meta në fjalën e tij.
Edhe kryetari i Bashkisë së kryeqytetit, .Lulzim Basha, pasi vendosi buqetën me lule pranë trupit të pa jetë të artistes, në fjalën e tij për mediat theksoi se “ndarja nga jeta e Besa Imamit, është një humbje e madhe e një aktoreje e cila do të mbetet e padvekshme jo vetëm duke u kujtuar per rolet që intepretoi në teatër apo kinematografi, por dhe si një ndër themelueset e teatrit në vend”.
Ndërkohë, me lotë në sy koleget dhe mikeshat e saj, Roza Anagnosti, Tinka Kurti, si dhe Margarita Xhepa, në fjalën e lamtumirës cilësuan dhe vlerësuan jo vetëm figurën e Imamit si një artiste qe shkëlqente në skenën e teatrit dhe kinematografisë, por edhe figurën e saj në rolin e nënës dhe të gruas.
“Ajo kishte një portret dhe një hijeshi që shkëlqente në skenë. Në skenë ishte fantastike edhe ana e brëndshme, e jashtezakonshme edhe me komunikimin. Ishte një grua krenare, të cilën e kam parë si idhull kur kam ardhur në teatër” tha Roza Anagnosti.
Ndërkohë që artistja e merituar, njëkohësisht një ndër mikeshat e saj, Margarita Xhepa, e ka cilësuar Imamin si “një zonjë fisnike, e cila në kohën e pasionit dhe talenteve, shkëlqeu midis aktorëve të mëdhenj”.
Besa eshte një ndër protagonistet që bashkë me kolegë të tjerë themeluan teatrin, ku nëpërmjet personazheve që ka intepretuar, do t? mbetet e pa harruar” u shpreh me pikëllim Xhepa.
Aktorja Besa Imami ka lindur në 8 Gusht të vitit 1928 në qytetin e Gjakovës. Në vitin 1937, familja e saj u shpërngul nga qyteti i Gjakovës për tu vendosur në Tiranë.
Artistja e Merituar, Besa Imami i ka dhënë publikut mbi 90-të role, midis të cilave përmendim rolin e Mbretëreshës Teuta tek “Artani”, rolin e Nënë Zyrasë te “Bashkë me Agimin”, rolin e Prendës te “Cuca e Maleve”, rolin e Rushës te “Halili dhe Hajria”, rolin e Lajes te “Lulet e Shegës” etj.
Në kinematografi u bë e njohur me rolin e Donika Kastriotit në filmin “Skënderbeu” të realizuar në vitin 1953.
Më pas do të vijonin role të tjera në filmin “Brazdat” në vitin 1973, “Në fillim të verës” në vitin 1975. Vetëm para pak kohësh me një propozim te Fondacionit Kulturor Mbarëkombëtar “Nermin Vlora Falaschi”, ajo u nderua nga Gjakova, vendlindja e saj , me titullin “Nderi i skenës shqiptare”.