Lidhja Demokratike e Kosovës (LDK), Bashkimi Demokratik (DK) dhe Lëvizja Vetëvendosje! (VV) në Prizren kanë uruar të gjithë besimtarët myslimanë me rastin e Festës së Kurban Bajramit.
Dega e Lidhjes Demokratike të Kosovës në Prizren dhe kryetari i saj, Eqrem Kryeziu, gjithë qytetarëve të besimit islam ju uron Festën e Kurban Bajramit .
“Kjo është festa e sakrificës së njeriut në emër të Krijuesit. Festa e Kurban Bajramit qëndron fuqishëm mbi parimet e bujarisë, flijimit, sakrificës, pajtimit dhe solidaritetit. Andaj, kjo festë gjithashtu na e zgjon ndjenjën e dashurisë ndaj të vërtetës, ndaj drejtësisë dhe ndaj çdo gjëje që është e mirë dhe njerëzore.
Prandaj çdo njeri duhet të kuptoj se jeton për të bërë vepra të mira dhe për ta luftuar të keqën. Çdo njeri ka për obligim të promovoj vlera të dashurisë, të përhap respekt, harmoni dhe kënaqësi te të gjithë ata që jetojnë pranë tij, pavarësisht përkatësisë nacionale apo besimit fetar”, thuhet në urimin e LDK-së.
Edhe Bashkimi Demokratik dhe kryetari i saj, Zafir Berisha, ua uron të gjithë besimtarëve islam Festën e Kurban Bajramit. “I dëshiruar të gjitha të mirat, që çdo ditë e juaja të jetë festë e përcjellur me gëzime dhe dashuri mes juve dhe familjeve tuaj.
Festat tona qofshin festa të bekuara në rrugën tonë për forcimin e lidhjeve mes nesh duke shtuar respektin e ndërsjellë, mirësinë dhe interesin e përbashkët për ndërtimin e një shteti I cili respekton të drejtat e çdo qytetari”, thuhet në urimin e BD-së.
Ndërkaq, Lëvizja Vetëvendosje! në Prizren, gjithashtu uron gjithë besimtarët islam për festën e Kurban Bajramit. “Kjo festë e shënuar në mbarë komunitetin islam simbolizon besëlidhjen mes njeriut e perëndisë, në emër të së ardhmes. Përmes sakrificës simbolike, historia e Kurban Bajramit na përcjell detyrën e respektimit dhe përkujdesjes për brezin e ri, për brezat e ardhshëm. Na përcjell detyrën për të ndërtuar familje të shëndosha, shoqëri të shëndoshë e një shtet e komb funksional që të garantojë sa më shumë drejtësi sociale, solidaritet e mirëqenie për bijtë e bijat tona.
Gjithashtu urojmë që qytetarët të lidhen edhe më fort në bashkësi e në shoqëri, duke i ruajtur e duke i përparuar vlerat, zemërgjerësinë, tolerancën fetare dhe shpirtin e sakrificës. Ne urojmë lumturi për ju dhe për familjet e tuaja, duke shpresuar që në vitet e ardhshme kjo festë të na gjejë edhe më mirë”, thuhet në urimin e VV-së./PrizrenPress.com/