Lidhja Demokratike e Kosovës (LDK) në Prizren, kërkon nga kryetari i Komunës,Ramadan Muja, që të tregojë arsyet pse nuk është duke u implementuar sistemi i adresave në qytet.
Zëdhënësi i LDK-së Shkëmbim Cikaqi thotë se Muja duhet të përgjigjet për këtë çështje.
“Të gjitha qytetet tjera në Kosovë e kanë përfunduar këtë proces madje edhe komunat më të vogla si Juniku, Fushë Kosova e Shtimja…”, thotë Cikaqi.
“Ndërkohë, komunarët tanë janë akoma në gjumin e thellë dimërorë”.
Duke e ditur që kusht për liberalizim të vizave është edhe përmbyllja e sistemimit të adresave, Cikaqi shtron këto pyetje për Mujën:
Pse Prizreni të bëhet pengesë në këtë drejtim?
Si është e mundur një qytet me mbi 40 milion euro buxhet të dështojë vazhdimisht, vit pas viti në këtë proces?
Çfarë arsyetimi do t’u japim gurbetqarëve këtë vit kur një gjë e tillë vazhdimisht u është premtuar?
“Për të gjitha këto duhet të përgjigjet Ramadan Muja”, shprehet ai.
“Ne si LDK kemi participuar në punën e Komisionit për emërimin e Rrugëve dhe Shesheve, madje përfaqësuesit tanë janë treguar shumë të suksesshëm në këtë drejtim”.
“Gjithashtu asamblistët e LDK-së e kanë mbështetur këtë projekt edhe në asamblenë e Komunës në maji të vitit 2015, dhe kanë treguar gatishmëri për bashkëpunim që sa më shpejtë qyteti i ynë të pajiset me tabelat e emërimin e rrugëve”.
“Por sot po bëhet një vit ndërkaq Komuna e Prizrenit nuk e ka bërë as një hap në këtë drejtim”.
“LDK shpreh keqardhje për anëtarët e Komisionit të cilët kanë bërë punë të madhe, me mbi 60 takime sa të lodhshme aq edhe të mundimshme dhe kot”.
“Por, urojmë që ky komision mos ta ketë fatin e atij të kaluarit 2013/14 i cili kishte dështuar nga mosinteresimi i komunarëve për punën e tyre”.
“Keqardhje ndjejmë edhe ndaj familjeve të dëshmorëve të cilët vazhdojnë të presin që një ditë t’i shohin emrat e më të dashurve të tyre në tabelat e rrugëve në qytetin për të cilin dhanë jetën, gjë që u është premtuar”.
“LDK do vazhdojë të ngrit zërin edhe në seancat e ardhshme të asamblesë ku do të kërkohet përgjigje nga kompetentët se për c’arsye është ndalur puna në këtë drejtim”./PrizrenPess.com/