Mesfushori me tipare sulmuese, Dani Olmo është një nga dëshirat e mëdha të Barcelona-s. 23-vjeçari katalanas ka qenë pjesë e “La Masia”-s para se të largohej në drejtim të Dinamo Zagrebit në vitin 2015.
Olmo pas gati pesë vitesh me skuadrën nga kryeqyteti kroat u transferua në Bundesliga-n gjermane. Leipzig-u pagoi 22 milionë euro për të marrë kartonin e tij në janarin e 2020.
Barcelona e ka pasur nën vëzhgim prej kohësh Olmo-n dhe në verë do të tentojë të bindë gjermanët, pasi lojtari e ka shfaqur hapur dëshirën per t’u bashkuar me klubin e fëmijërisë.
Mirëpo Leipzig-u nuk do t’i bëjë ndere katalanasve. Së bashku me Andre Silva-n dhe Christopher Nkunku-n, Olmo është ndër lojtarët më të rëndësishëm në skuadër.
Edhe pse vlera e kartonit të tij në treg është rreth 50 milionë euro, pak më shumë se dyfishi i shifrës që gjermanët shpenzuan për ta blerë, ata pretendojnë jo më pak se 80 milionë euro.
Një shifër kaq e lartë e ka bërë Barcelona-n të mendohet dy herë para se të ndërmarr një hap më konkret për nënshkrimin e 23-vjeçarit.
/Albanianpost.com