Kreu i Nismës për Kosovën, Fatmir Limaj, do që urgjentisht të bëhet publik raporti i ekspertëve kosovarë të mjekësisë ligjore për autopsinë e të rënëve në Kumanovë, në luftimet e para dy javëve atje.
Ai ka thënë se nuk i beson ekspertizës së regjimit të Gruevskit, të cilin e ka quajtur kriminal.
“Duke shprehur gjithë mirënjohjen për ekipin e ekspertëve tanë mjekoligjor, të cilët shumë shpejt ju përgjigjën dhe mbaruan autopsinë e djemve të vrarë në Kumanovë, kërkojmë që menjëherë të bëhet publik raporti i ekspertëve tanë për t’u njohur me të vërtetën, pasi që shumë shkrime e fjalë janë thënë këto ditë për rrethanat e vrasjeve të djemve tanë”, ka shkruar Limaj, në profilin e tij në Facebook.
“Ne nuk besojmë në asnjë hetim apo ekspertizë që vjen nga regjimi kriminal i Gruevskit, prandaj kërkojmë që menjëherë të bëhen publike raportet e ekspertëve tanë dhe kështu opinioni sa më parë të dijë se për aq sa mund të dihet nga ky raport një pjesë e së vërtetës se si janë vrarë dhe në çfarë gjendje kanë qenë kufomat e të vrarëve, kjo tani është urgjente”, thuhet më tej në reagimin e tij.