Transformimi i Forcës dhe i Sigurisë së Kosovës në ushtri ende po vazhdon të mbetet “peng” nga deputetët e minoriteteve, respektivisht nga Lista Serbe.
Shefi i Grupit Parlamentar nga kjo parti, Slavko Simiç, ka treguar për “Zërin”, se përfaqësuesit e “Srpska”-s janë duke zhvilluar disa takime me kryeministrin e Republikës, Isa Mustafa, por që ende nuk ka diçka përfundimtare.
Duke folur për këtë çështje ai specifikon se për vendime të rëndësishme konsultohen edhe me Qeverinë e Serbisë, të cilën e udhëheq Aleksandër Vuçiq.
“Në kohët e fundit në disa mediume të Kosovës është përhapur lajmi se kryetari i Listës Serbe, Aleksandër Jabllanoviq, ka biseduar me kryeministrin, Isa Mustafa, dhe i ka dhënë mbështetje për krijimin e Ushtrisë. Kjo është e pavërtetë, pasi që Jabllanoviq nuk ka biseduar me Mustafën për votimin. Mirëpo, unë kam disa informata se disa zyrtarë të komunitet serb dhe disa ministra kanë biseduar me Mustafën lidhur me shndërrimin e FSK-së në Ushtri, por çka është thënë në takim s’kam detaje më shumë”, ka thënë ai për “Zërin”.
Simiç më tej tregon se në Kryesinë e Kuvendit të Kosovës ka pasur iniciativa që të futet në rend të ditës amendamenti për shndërrimin e FSK-së në Ushtri. Mirëpo, partia e tij nuk ka qenë e gatshme që ajo të futet në rend të ditës.
“Jo pse Lista jonë dëshiron të bllokojë diçka, por me arsyen se gjithë deputetët e ‘Srpska’-s nuk kanë qëndrim definitiv dhe të prerë për FAK-un. Të gjithë deputetët tanë, që janë pjesë e Kuvendit dhe ata që janë pjesë e Qeverisë së Isa Mustafës, nuk janë për të bllokuar proceset, por qëndrimi ynë është që të japim mundësitë tona për zhvillim ekonomik, bashkëjetesë, për hapjen e vendeve të punës. Gjithçka që ka të bëjë me popullin serb ne do ta përkrahim, ndërsa proceset negative nuk do t’i përkrahim”, është shprehur ai.