Prokuroria e Shtetit me të gjitha institucionet vartëse është duke u konsoliduar dhe vazhdimisht është duke punuar në hetimin, ndjekjen dhe luftimin e kriminalitetit, në veçanti atij të organizuar dhe korrupsionit. Kështu ka deklaruar, të mërkurën, kryeprokurori i Shtetit, Aleksandër Lumezi, në ceremoninë e organizuar me rastin e promovimit të Doracakut të Jurisprudencës.
Ai ka shtuar se janë duke punuar në hartimin e planeve për një punë sa më të suksesshme të Këshillit dhe të Prokurorisë së Shtetit.
“Ne po bëjmë përpjekje për një procedurë sa më efikase penale, duke u kujdesur maksimalisht që të mbrojmë të drejtat themelore të individëve. Normalisht, zhvillimi i procedurës penale brenda suazave ligjore mund edhe të shkaktojë pakënaqësi te palët e përfshira, por në jemi të vendosur që të punojmë shumë në profesionalizimin e prokurorëve tanë në mënyrë që të gjitha rastet t’i kryejmë brenda afateve ligjore dhe të kemi sukses në të gjitha ato akte akuzuese që ua dërgojmë gjykatave”, ka deklaruar Lumezi.
Ai tha se mbesin të angazhuar në zbatimin e drejtë dhe të përpiktë të ligjit sepse sipas tij, kështu mund të rrisim autoritetin e Prokurorisë së Shtetit, të forcojmë respektin e shoqërisë për këtë organ dhe të ndikojmë pozitivisht në harmoninë e shoqërisë sonë.
E sa i përket promovimit të doracakut për provimin e Jurisprudencës, Lumezi ka thënë se ky doracak prek në esencë çdo profesionist të sistemit gjyqësor të Kosovës, si gjyqtarin, si prokurorin ashtu edhe avokatin dhe të gjithë ata që merren drejtpërdrejtë dhe tërthorazi me sistemin gjyqësor.
“Sot, në këtë promovim të Doracakut për provimin e Jurisprudencës po e hedhim edhe një hap drejt krijimit të mundësisë për përfitimin e njohurive juridike për kuadrat e reja që kanë vullnet për tu përballur me detyrën e juristit në institucionet e drejtësisë. Profesionistëve juridik i duhet një doracak që i pajis me njohuri të përgjithshme dhe specifike për sistemin e drejtësisë në Kosovë, por mbi të gjitha atyre iu duhet një doracak që i ndihmon kuptimin dhe aplikimin e drejtë të normave juridike në situatat e dhëna faktike”, ka shtuar ai.
Ai shtoi se vendit tonë nuk i duhet një ndarje e qartë e kompetencave të institucioneve dhe ushtrimi maksimal i diskrecionit profesional të çdo institucioni.
Sipas tij, nëse ndonjëra nga hallkat e gjyqësorit nuk është në nivel të detyrës rrjedhimisht të gjitha organeve tjera u vështirësohet funksionimi./ KosovaLive