I akuzuari për lëndim të lehtë trupor, Sadri Javori, nuk e ka pranuar fajësinë në seancën fillestare të së premtes në Gjykatën Themelore në Gjakovë, dega në Malishevë.
Para leximit të aktakuzës, prokurori Armend Zenelaj bëri edhe rikualifikimin e veprës penale, nga vepra penale lëndim i lehtë trupor nga neni 188, paragraf 1, të KPRK-së, në veprën penale lëndim i lehtë trupor, nga neni 188, paragraf 1, nën paragraf 1.4, të KPRK-së.
Pas rikualifikimit të vepër penale prokurori Zenelaj, lexoi aktakuzën, ndërsa i akuzuari Javori, ka thënë se nuk e ndien veten fajtor për veprën për të cilën akuzohet.
“Rasti ka ndodhur, por nuk është rasti ashtu siç përshkruhet në aktakuzë, pasi që i dëmtuari këtu në aktakuzë, ka filluar i pari të më gjuaj me gurë, dhe jo unë siç thuhet në aktakuzë”, ka thënë ai.
Meqenëse, i akuzuari nuk e ka pranuar fajësinë, gjykatësi i çështjes Njazi Morina, e ka udhëzuar atë që deri në seancën e shqyrtimit të dytë, të paraqesë kundërshtimin ndaj provave në aktakuzë, apo kërkesë për hudhje të aktakuzës.
Mirëpo, i akuzuari Javori, ka kërkuar që në shqyrtim të dytë të ftohet edhe i dëmtuari, Besim Javori.
Gjykatësi Morina, me aktvendim seancën e radhës e ka caktuar për 3 maj 2019, në ora 10:30.
Ndryshe, sipas aktakuzës së ngritur më 15 mars 2016 nga Prokuroria Themelore në Gjakovë, Sadri Javori, akuzohet se më 9 gusht 2015, rreth orës 21:35, në fshatin Llozicë, Komuna e Malishevës, i kishte shkaktuar lëndime të lehta trupore të dëmtuarit Besim Javori, lëndime këto të konstatuara nga ekspertiza mjekoligjore.
Në aktakuzë thuhet se, derisa i dëmtuari po kthehej me automjet në shtëpi, dhe afër derës hyrëse të shtëpisë i vëren disa pengesa në rrugë (paleta), i njëjti e ndal automjetin dhe fillon t’i largojë pengesat, dhe pas këtij veprimi nga ana e të dëmtuarit, i akuzuari fillon ta gjuan me gurë të dëmtuarin dhe e godet në pjesë të ndryshme të trupit.
Me këtë, i akuzuari Javori po akuzohet se ka kryer veprën penale lëndim i lehtë trupor, nga neni 188, paragraf 1, nën paragraf 1.4, të KPRK-së. /Betimipërdrejtësi