Spanja ka shënuar fitore me rezultat 2:0 në “Fadil Vokrri” kundër Kosovës.
Pablo Fornals dhe Ferran Torres, ishin dy golashënuesit e “Furisë së kuqe”. Për ndeshjen ka shkruajtur gazeta sportive “Marca”. Në artikullin e saj shkruan se Spanja vuajti në ndeshjen kundër Kosovës.
“Marca” thekson faktin se çfarëdo rezultati tjetër do të mund t’i rrezikonte Spanjës vendin e parë në grupin B.
“Furia e kuqe” e kishte njërin sy në kryeqytetin kosovar dhe tjetrin në Athinë, ku Suedia përballej me Greqinë.
Në fund, fati i buzëqeshi Spanjës, e cila ia doli ta mposhtë 2:0 Kosovën dhe Greqia i bëri nder duke e mundur Suedinë 2:1, që nënkupton se ish-kampionia e botës e ka tani fatin në duar të veta.
Planet do të mund t’i prisheshin spanjollëve nëse Muriqi, Rashica, Rashani dhe Loshaj do t’i shfrytëzonin rastet që i patën.
“Spanja vuan për ta fituar ndaj Kosovës”, ishte titulli i raportit të gazetës për ndeshjen në Prishtinë.
“Ishte e qartë pas rifillimit të ndeshjes (pas pushimit mes pjesëve) se duhej ta rrisnim epërsinë sa më shpejt që ishte e mundur, sepse në çdo çast Kosova mund të ta fusë frikën në palcë. Dhe kështu bëri”.
Spanja mbetet lidere e Grupit B tani me 13 pikë, katër më shumë sesa Suedia në vendin e dytë.
Por kjo e fundit i ka dy ndeshje më pak të zhvilluara. Greqia është e treta me 6 pikë, ndërsa Kosova e katërta me 4 pikë. Gjeorgjia është e fundit me një pikë.
Spanja do ta ketë një përballje të fundit me Suedinë dhe aty pritet të vendoset fituesi i grupit, i cili shkon direkt në Katar 2022. Vendi i dytë duhet të luajë në “play-off” për kualifikim.
