Ministria e Arsimit Shkencës dhe Teknologjisë, gjatë vitit 2014 sa ishte nën udhëheqjen e ministrit Ramë Buja, ka bërë blerjen e librave shkollorë, e të cilët libra nuk u shpërndanë asnjëherë për nxënësit.
Kështu ka bërë të ditur Auditori i përgjithshëm në raportin e tij i cili e ka titulluar këtë si “Dobësi në procesin e furnizimit me libra shkollorë dhe universitar-prioritet i lartë”.
Auditori ka vënë në dukje se procesi i furnizimit me libra shkollorë për nxënësit e shkollave fillore në 2014 është përcjell me dobësi që kanë rezultuar me sasi të tepërta të librave të furnizuar, si rezultat i planifikimit të dobët të kërkesave dhe menaxhimit të dobët të pranimit të librave, shkruan Kosova Sot.
Këto libra të blera nga MASHT, në vlerë rreth gjysmë milioni, sipas Auditorit, kanë mbetur nëpër stoqe, të pa shpërndara për nxënësit që duhej të pajiseshin me tekste shkollore falas.
Ndër tjerash, Auditori ka gjetur se UP-ja është furnizuar me libra për nevoja të veta ku janë paguar mbi 1 milionë euro për libra shkencorë.
Gazeta Kosova Sot, ka mësuar se drejtorët e shkollave me qëllim porosisin më shumë libra të cilat më pas ua sheshin librarive me një çmim prej 0.50 euro për libër.
Ndryshe, Ministri i MASHT, Arsim Bajrami, tha për Kosova Sot se librat e mbetur do të përdoren në vitin e ri shkollor.