Ka arritur në Prokurorinë Themelore të Prizrenit, kallëzimi penal ndaj ish kryetarit të komunës së Prizrenit, Eqrem Kryeziu dhe tre vartësve të tij- Hysein Kazas, ish drejtorit të Urbanizmit dhe planifikimit hapsinor, Ylber Gashit, hartues i lejes ndërtimore dhe studios projektuese “DIARKO” të Iftiman Lutfiut nga Prizreni, transmeton RTK.
Këta persona akuzohen se, në periudhen kohore 2006-2008 pas hartimit të Planit të Përkohshëm Rregullues Urban të zonës së Prevallës në Parkun Nacional “Sharri” nga Asambleja Komunale e KK të Prizrenit, kanë lëshuar një numër të konsiderueshëm të lejeve ndërtimore në kundërshtim me planin rregullues urban, si dhe dispozitat ligjore të cilat rregullojnë fushën e Planifikimit Hapësinor.
Në kallëzimin penal thuhet se personat e lartpërmendur kanë ushtruar ndikim dhe presion te vartësit e tyre, duke i urdhëruar që gjatë kësaj periudhe kohore të lëshojnë leje ndërtimore për ndërtimin e objekteve në fshatin turistik Prevallë në kundërshtim me Legjislacionin egzistues.
Në rast të ngritjes së aktakuzës për këtë çështje dhe të shpalljes fajtorë të të akuzuarve, këta të fundit mund të dënohen deri me 8 vjet heqje lirie.
Kallëzimi penal për tre të apostrofuarit është bërë nga MMPH, më 11 Mars 2013. Sipas kryeprokurorit Sylë Hoxha, të përfolurit në aktakuzë ende nuk janë njoftuar me këtë lëndë.