Ministri i Arsimit, Shkencës dhe Teknologjisë, Shyqiri Bytyqi ka njoftuar në Kuvendin e Kosovës se në Kosovë janë mbi 100 mësimdhënës që janë në gjendje të keqe shëndetësore dhe që nuk janë në gjendje për të shkuar në shkolla dhe për të mbajtur orët mësimore.
“Është e vërtetë që është shqetësim i madh, ne menjëherë kemi pasur takime me drejtorët e DKA-ve që të na sjellin numrin e mësimdhënësve që janë në gjendje të keqe shëndetësore, ne e kemi marrë këtë numër, janë mbi 100 mësimdhënës që janë të sëmurë dhe nuk janë në gjendje t’i mbajnë orët e mësimit”, ka thënë Bytyqi.
Ministri është shprehur se kanë biseduar edhe me ministrin Reçica që të bëhet një zgjidhje për këtë çështje.
“Zgjidhja do të jetë në këtë vit, nëse ministri Reçica e kryen me udhëzim administrativ, nëse jo ne do të gjejmë një zgjidhje tjetër”, ka vazhduar Bytyqi.