Kryesuesi i Kuvendit të Prizrenit, Artan Abrashi, për ditën e enjte 01.03.2018 ka thirrur mbledhje të jashtëzakonshme të Kuvendit të Prizrenit, sipas kërkesës së kryetarit të komunës, Mytaher Haskuka, me një pikë të vetme për rend të ditës, shqyrtimi i propozimvendimit për rritjen e mjeteve nga të hyrat vetanake për vitin 2017.
Propozimvendimi ka të bëjë me vendimin që duhet marrë organi më i lartë legjislativ në Prizren, ku mjetet për të hyra vetanake për vitin 2017 kanë qenë të planifikuara në vlerë prej 6 milionë e 102 mijë e 106 euro, me ç’rast në fund të vitit të kaluar janë inkasuar të hyra vetanake 7 milionë e e 136 mijë e 421 euro. Nga kjo rezulton shënim i rritjes të të hyrave vetanake ( tejkalim) në shumë prej 1 milionë e 32 mijë e 315 eurove.
Shpërndarja e mjeteve të rritura nga ajo që kanë qenë të planifikuara, do të bëhet në programe ( drejtori) dhe kategori ekonomike, respektivisht bëhet rritja e këtyre kategorive si në vijim :
Paga dhe Mëditje për programin Arsim dhe Shkencë-
Nënprogrami për shkollat fillore : 71 mijë e 955 euro
Nënprogrami për shkollat e mesme :25 mijë e 883 euro
Subvencione-
Për programin Shërbimet Sociale dhe rezidenciale :
Nënprogrami Shërbimet Sociale : 50 mijë euro
Investime kapitale-
Për kategorinë ekonomike investimet kapitale , rritja të bëhet në vlerë prej 886 mijë e 477 eurove për programet dhe nënprogramet e dhëna në tabelarin e projekteve kapitale që do të iu shpërndahet kuvendarëve.