Media dhe korrupsioni janë dy tema përjetësisht të lidhura. E para duhet ta zbulojë të dytën, por shpesh edhe e dyta lidhet zingjirë me të parën, dhe kjo nënkupton një katastrofë mediale.
Media nuk është e lirë dhe as nuk luan shumë rol në luftimin e korrupsionit në Kosovë, e ky i fundit po rritet dita ditës.
Një debat i tillë sot erdhi nw në edicionin e 14-të të Festivalit të Filmit dhe Dokumentarit DokuFest në Prizren. Përfaqësuesë të mediave dhe shoqërisë civile kanë diskutuar mbi rolin e medias në luftimin e korrupsionit, duke diskutuar mbi diskurse e narracione të ndryshme të problemit në fjalë.
Arbana Xharra – kryeredaktore në të përditshmen “Zëri” – mes tjerash ka treguar për rastet kur ajo është kërcënuar edhe pse ka provuar me çdo forcë gazetareske të ndërhyjë në luftën e fortë me korrupsionin kosovar.
“Gazetaria ka për detyrë të ndërhyjë në çështjet si korrupsioni, por shteti asnjëherë nuk reagon për asgjë, edhe kur ne kemi prova dhe dëshmi e jo burime anonime” tregon Xharra. Gazetare qysh prej moshës 19 vjeçare, ajo ka treguar në Hamamin e Prizrenit mbi rastet kur është kërcënuar me veturë, me mesazhe elektronike, e në rastet më ekstreme është përndjekur nga njerëz të panjohur me veturë dhe në një rast në shtëpinë e saj është vjedhur kompjuteri dhe është hyrë me forcë.
“Megjithatë, ajo që mua më motivon të merrem me gazetari është senzibilizimi, rritja e vetëdijes qytetare që të raportohet. Sot e di se ka njerëz që mund ta thonë me plot gojën të vërtetën mbi krimet e luftës, mbi korrupsionin në baza ditore, dhe mbi dukuritë tjera negative. Në një rast u pata shpallur edhe si islamofobja e vitit, por kjo ka pak rëndësi në luftën për të vërtetën” vazhdon Xharra.
Debati i sotëm në DokuFest ka nxjerrë në pak edhe ekspertizën ndërkombëtare në ndihmë të mediumeve të pavarura nga shtrëngimi shtetëror.
Alessandra Roccasalvo thotë se qëllimi i kësaj organizatë është puna në dy aspekte: në forcimin e vetë intitucioneve shtetërore dhe puna me to, dhe në anën tjetër edhe fuqizimi i zërit qytetarë në bërjen e ligjeve.
“Po përmend këtu rastin e Kallxo.com – një platformë e cila si e tillë provon drejtpërdrejt të merret me luftimin e korrupsionit duke shfrytëzuar publikun si burimin kryesor proaktiv. Gjithashtu si UNDP po japim edhe çmime të cilat vit për vit po ndihmojnë në fuqizimin e gazetarëve për të raportuar e gjetur sa më shumë korrupsionin në vend, drejt një aparati mediatik larg kontrollës qeveritare e shtetërore” pohon Roccasalvo.
Në debat kanë folur edhe Agron Demi nga GAP, Marija Ristiç nga BIRN, Hajrullah Çeku nga EC MA NDRYSHE si dhe Petrit Saraçini, analist i medias. /KultPlus.com/