Në Rahovec është duke u mbajtur organizimi kryesor i dhurimit të gjakut në Ditën Botërore të Dhurimit të Gjakut, organizuar nga Iniciativa Qytetare Pozitive e Rahovecit, në kujtim të humanistit Elvis Pista, i cili u vra një vit më parë.
Qytetarët në mënyrë masovike po i përgjigjen aksionit ku deri tash rreth 100 persona kanë dhuruar gjak në qendrën e improvizuar të dhurimit të gjakut në Hotel Park Plaza.
Në aksionin e organizuar në kujtim të Elvis Pistës, gjak ka dhuruar edhe motra e humanistit të vrarë një vit më parë, Beatrisa Pista. Ajo dhuroi gjak në shoqëri të bashkëshortit të saj Hektorit.
Dhurimi i gjakut #PërElvisin po vazhdon dhe do të zgjasë deri në ora 18:00. /Telegrafi/