Kryetari i Prizrenit, Ramadan Muja,është rrëfyer sot për herë të fundit para trupit gjykues në Gjykatën Themelore në Prizren.
Ai tha se nuk ndjehet fajtor për akuzat që e ngarkon Prokuroria e EULEX-it.
“Unë e ndiej veten plotësisht të pafajshëm”, ka thënë Muja.“Nuk kam bërë vepër penale. Çdo vendim që e kam marrë, ka qenë në interes të qytetarëve”.
Muja,ka kërkuar nga trupi gjykues që të shpenzojë kohën,dhe të shkojë të vizitojë vendin e quajtur “Boka- Boka”.
“Ai vend, ka qenë vend i zharpinëve dhe ngordhësirave, tani është bërë vend i qytetëruar”.
Muja,tregoi se në atë zonë, nga Ministria e Kulturës Rinisë dhe Sporteve, do të ndërtohet edhe një fushë e futbollit, ku do të shfrytëzohet për gara ndërkombëtare.
“Do të ndërtohen edhe objekte tjera. Çfarë të keqe ka që kemi ndarë atë zonë për ndërtimin e fabrikës së çokollatës ‘Kamila’ dhe për ndërtimin e shkollës “Mehmet Akif””
“Në fund dua t’ju them se nuk e ndiej veten fare fajtor. Jam ballëhapur para gjithë qytetarëve të Prizrenit”.
“Jam i sigurt të dalë lirshëm në qytet, për dallim nga paraardhësit e mi të cilët kanë dalë me makina të blinduara dhe të përcjellur nga ndërkombëtarët”.
Muja ka kërkuar nga trupi gjykues që të marrë për bazë argumentet e avokatëve mbrojtës.
“E lus Zotin, që t’ i studioni mirë edhe fjalët e fundit të avokatëve tanë shumë të respektuar dhe të merrni vendim të lirë pa ndikime dhe pa anime”.
Kryetarit të Prizrenit, Ramadan Muja, i rëndon një aktakuzë 21 faqesh, me të cilën ai dhe Sadik Paçarizi (Ish-drejtor i Urbanizmit dhe Planifikimit Hapësinor), Avni Ademaj (Ish-u.d. së Drejtorit të Gjeodezisë dhe Kadastrës), Kadri Ukimeri (Ish-drejtor i Gjeodezisë dhe Kadastrës, Abdullah Tejeci (Ish-drejtor i Gjeodezisë dhe Kadastrës dhe Minir Krasniqi (Ish-drejtor i Administratës, akuzohen për shpërdorim të pozitës zyrtare në dhënien e disa pronave shoqërore në shfrytëzim për disa kompani, me qëllim të përfitimit persona.Gjykimi i “Mujës dhe të tjerëve”, pritet të përfundojë me 14 mars /PrizrenPress.com/