Guvernatori i New Jersey dhe kandidati republikan Chris Christie i ka dhënë mbështetjen e tij në garën për president miliarderit Donald Trump.
Christie u tërhoq nga gara për besimin e partisë për zgjedhjet presidenciale pas dështimeve të njëpasnjëshme dhe sondazheve që e nxirrnin jo mirë.
“Jam i lumtur që do të jem në ekipin e Trump dhe mezi pres të punoj me të”, ka thënë Christie.
Trump është mundësia më e mirë që Republikanët t’i fitojnë zgjedhjet, ka shtuar ai.
Christie ka theksuar edhe se senatorët e rinj Ted Cruz dhe Marco Rubio janë të papërgatitur për atë që i pret.
Nuk kam dyshime që Trump do të ndryshojë shumë gjëra dhe se do ta mposhtë kandidaten demokrate, ish sekretaren e shtetit, Hillary Clinton në zgjedhjet presidenciale, ka përfunduar Christie.