CHARLES BUKOWSKI
Bëni dashuri nën diell, nën diellin e mëngjesit
në një dhomë hoteli
që jep në rrugicën
ku të varfrit janë në kërkim të shisheve;
bëni dashuri pranë një qilimi
më të kuq se gjaku ynë;
bëni dashuri derisa djelmoshat shesin lajme
dhe Cadillac;
bëni dashuri pranë një fotografie të Parisit
dhe një pakete të hapur të Chesterfieldit;
bëni dashuri ndërsa burra të tjerë –
të varfër
të dobët
punojnë.
Nga ai moment e deri këtu…
ndoshta kanë kaluar vite si i llogarisin ata,
por kjo është vetëm një frazë në mendjen time –
ka kaq shumë ditë
kur jeta ndalon, afrohet dhe ulet
dhe pret si një tren në binarë.
Kaloj pranë hotelit në orën 8 dhe 5; janë ca mace në rrugicë
ca shishe dhe vagabondët,
ngre vështrimin në dritare dhe mendoj,
nuk e di ku je më,
rifilloj të ec dhe pyes veten:
ku
shkon jeta
pasi të ndalet?!
(Zgjodhi dhe përktheu Leonora Buçinca. Marrë nga vepra “On Love”)